Saturday, February 13, 2010

प्रेम दिवसको सन्दर्भमा :-

प्रेमको अर्थ व्यापक हुन्छ भन्ने कुरा थाहा हुँदा हुँदै पनि 'प्रेम' भन्ने बित्तिकै स्वाट्ट सबैको दिमागमा अनुभूत हुने बिषय भनेको स्त्री-पुरुषका बीचमा हुने प्रणय नै हो | यसलाई सबैभन्दा बढी शक्तिशाली प्रेमका रूपमा पनि लिन सक्नुहुन्छ तपाईं | यसो भएर पनि अरू प्रेमहरू प्रेमको विश्लेषणको क्रममा मात्र डोरिएर आएका होलान् | मुनामदन, लैनामज्नु, रोमियोजुलिएट जस्ता प्रशिद्द कृतिहरू पनि स्त्री-पुरुषकै वृत्तमा फन्को मारेको पाईन्छ | ताजमहल स्त्री-पुरुषकै प्रेमको पिण्ड हो | तपाईं सुन्दर नारी हुनुहुन्छ तर सोच्नुहोस् कि तपाईंको जीवनमा पुरुष कहीं पनि छैन | के तपाईंलाई लाग्छ कि तपाईंको जीवन साँच्चै नै सुन्दर छ ? यो प्रश्न पुरुषको हकमा पनि यसरी नै लागु हुन्छ |हरेकले यस्तो अबस्थामा आफ्नो जन्मप्रति नमीठो प्रश्न अनुभव गर्छ जीवनमा | साँच्चै नै मृत्युप्रतिको घृणा जीवनप्रतिको मोहको उपज मात्र हो | त्यसो त कतिपय बिपरित लिङ्गीहरू तपाईंको जीवनमा योजनाबद्दरूपमा बर्बादी लिएर पनि आउन सक्छन् | तर मैले यो अप्राकृतिक प्रणालीको बिषयमा कुरा गर्न चाहेको हैन | म नारी पुरुषका बीचमा हुने असली आकर्षण र प्रेमको बिषयमा केही भन्न खोजीरहेको छु, जो सम्पूर्ण प्रेममा सर्बोच्च स्थान ओगटेर बसेको हुन्छ र प्रेम भन्ने बित्तिकै हामी उसैको पहिला स्मरण गर्न पुग्छौं | प्रेम दिबसको छेऊ छाऊमा मानिसहरूले तिम्रो 'ग्रल फ्रेन्ड' छ अर्थात् तिम्रो 'ब्वाई फ्रेन्ड' छ भनेर सोधेको कारण पनि शायद यसैले होला | हुनत प्रेम बाबुछोरामा पनि हुन्छ, तर छोराको मायाको खातिर बाबुले खोलामा हामफालेको वा बाबुको मायाको खातिर छोरो पासो लागेको घटना निश्चय नै नौलो समाचार हुनजाला जस्तो कि प्रेमी प्रेमिकाको लागि यो नौलो बिषय होइन | मृत्यु कुनै पनि कुराको समाधान होइन | बाँच्नेहरूका लागि यसको असर निक्कै नै गहीरो हुन्छ | आख्यानहरूमा बगेका मृत्युका घटनाहरूले नै हामीलाई कति सिथिल बनाउँछन् कति !
कसरी बुझ्ने प्रेमलाई !
संसार भ्रमको मायाजाल रहेछ भनेर हाम्रा पुराणहरू हामीलाई सुनाउँछन् | भ्रम नै हो जस्तो लाग्छ धेरै जसो त ! तर यो भ्रम भित्र जीवनको यति मीठो आनन्दको पाटो कसरी छिपेको होला कुन्नि ! एउटा रमाइलो ड्रामा हेरे जस्तो हामी त अघि नै भुसुक्क भइसकेका हुन्छौं जिन्दगीदेखि, थाहा नपाइकनै | वाह ! प्रेम ! ...... आँखिर हो के यो ? यसको उत्तर न तपाईंसँग छ न मसँग | तर रमाईलो कुरा के छ भने प्रेम हामी दुवैसँग छ | उत्तर किन चाहियो र ?खुरु खुरु प्रेम गर्नुहोस् | तपाईं 'प्रेम आफै हुन्छ' भन्ने तर्क गर्न पल्किनु भएको छ भने यसलाई आफै हुन दिनुहोस् | नरोक्नुहोस् , नत्र तपाईं आफै रोकिनु होला | अनुशासासन सबै क्षेत्रमा लागु हुने बिषय हो र प्रेममा पनि यसलाई नभुल्नु होला |
कसैको कुरा नसुन्नुहोस् -
म भन्छु - कसैको अर्ति नसुन्नुहोस् जीवनमा प्रेमका खातिर | मेरो पनि | पुस्तक पढेर प्रेम नगर्नुहोस | फिल्म हेरेर प्रेम गर्न नसिक्नुहोस | खालि अनुभव गर्नुहोस् प्रेमलाई |अभिनयमा सबै पोख्त हुन सकिन्छ भन्ने छैन | फेरि सबै ब्याक्तिले असली प्रेममा अभिनयलाई रुचाउँछन् भन्ने पनि छैन | प्रेम हृदयदेखि गर्नुहोस् | तपाईंको प्रेम दुनियाँमा शक्तिशाली प्रेम हुनेछ |
तपाईंले भन्नुहोला - कहिले कहीं हृदयले काम गरेन भने ?
यसका विकल्पहरू चाहीं परलोक मै प्रशस्त छन् भन्ने सुन्नमा पाइएकाले म यो पोस्टलाई लम्ब्यउन चाहन्न |
तपाईं मदेखि चिडिनु भए जस्तो छ | शान्त हुनुहोस् | उत्तर आफै भित्र खोज्नुहोस | अरुका सल्लाहले सँधै आफुलाई काम दिन्छ भन्ने छैन | अनुभव गर्नुहोस् | भनिसकि गएँ नि मैले अघि नै ! कसैका कुरा नसुन्नुहोस आफ्नो निजि प्रेममा | मेरा पनि |
धराबासी भन्नुहुन्छ "हुँदै नभएकोलाई भएको मानेर त्यसलाई खोज्दा गलेको हो मान्छे|" थाक्नु भएको छ भने कुरै खतम | यसैलाई ओके गरेर आराम गर्नुहोला | नभए अझै खोजी गर्नुहोला | भेटाउनु भयो भने हामी मिलेर उहाँलाई मुखभरीको जवाफ दिनुपर्छ | तपाईंले एक्लै दिए पनि हुन्छ | हामी भनेर तपाईंको दु:खको जस मैले पनि लिन खोजेको हैन | मलाई त तपाईंको उत्तर भए पुगी गयो नि ! आँखिर प्रेम के हो ?? ?
प्रेम जे होस् मलाई मन पर्छ, तपाईंलाई जस्तै | मेरो तर्फबाट तपाईंलाई प्रेम दिबसको हार्दिक शुभकामना !!!

4 comments:

Dilip Acharya said...

ल है यो पोस्ट पढेर मलाई पनि प्रमको बारेमा केही बुझे जस्तो लाग्यो ।

मेरो पनि शुभकामना । संसारमा प्रेम फैलियोस !

Basanta said...

यो प्रेमचर्चा मन प-यो। ढिलै भएपनि प्रेमदिवसको शुभकामना मेरो तर्फबाट।

Chaitanya said...

प्रेमको गहन चर्चा पढ्न पाइयो| तर यो प्रेम दिवस भन्ने कुरासित म त्यति सन्तुष्ट छैन | प्रेम दिबस मनाएपछि त मान्छे हराए पनि हुँदो रहेछ | अब संबिधान दिबस मनाउने दिन आइसक्यो,निस्कनुपर्यो मणिजी |

Chaitanya said...

तपाईं र तपाईंका पाठकहरुलाई नयाँ साल २०६७ को हार्दिक शुभकामना !